Thursday, 11 March 2010

فقعوا مرارتك يا ريس


سلامتك يا ريس .. ربنا يديلك الصحة وطولة العمر ويبعد عنك وعن اي مصري اي مرض وحش
صدقني حسيت زي ما يكون حد من أهلي تعبان .. الف بعد الشر عليك يا ريس .. لو مقلقتناش عليك هنقلق على مين ده انا من ساعة ما عيني فتحت عالدنيا مشفتش غيرك
بس انا ليا عتاب صغيرعندك يا ريس ..
بقى اول ما تتعب كده تسيبنا وتسافر انت كمان بتهاجر ؟ بقى أكتر من 20 الف دكتور مش مأمنهم على نفسك وفيه اكتر من 80 مليون مأمنينك ومسلمينك نفسهم يا ريس !!
ده انا قعدت اتخيل لو كنت عملتها في مستشفى مصرية كان هيحصل ايه .. أكيد كنت اتنقلت باالاسعاف الطائر الي بسمع ان النقلة فيه بالشىء الفلاني وبتتحسب بالكيلو مش زي الاسعاف التوك توك الي بنشوفه
وكان زمان المستشفيات مش نضفت وبس لا دي كانت اتهدت واتطورت من جديد وكانوا جابوا فيها كل الاجهزة والادوية الناقصة وادوات الغيار والالات الجراحية كانوا جابوها جديدة واتعقمت عشرين مرة .. والاسانسيرات ركبت واتصلحت .. وكان زمان الحيوانات والحشرات المعششه اختفت وكانت السراير اتفرش عليها ملايات جديدة ومراتب ومخدات سليمة ووو... مش هطول عليك يا ريس يا بخت من كتب وخفف
وقعدت اتخيل الدكتور الي كان هيعملك العملية يا ترى كبير اساتذة الجامعات ولا دكتور حاتم شخصيا الا بالحق هو تخصص ايه ؟!! وكانوا جابوا طقم مضيفات يردوا الروح مش ممرضات يجيبوا المرض بصوتهم وزعيقهم واحجامهم !!
ولو كنت محتاج اكياس دم كنا بعتنا نجيبهالك مستوردة بس طبعا نتأكد من تاريخ صلاحيتها اصل دي بالذات يا ريس منضمنش فيها الشعب المصري لانه اما عنده فيروس سي او ايدز او معندوش دم اساسا من كتر ما الحكومة مصيته ..
وكان زمانهم استئصلوا مرارتك وحطولك مكانها واحدة بلاستيك عشان تستحملنا يا ريس ووكانت دي تبقى اول عملية زرع عضو ناجح طبعا بموافقة الحزب وكانوا خدوا المرارة القديمة حطوها في المتحف عشان يدرس عليها طلبة الطب وتجيلهم في الامتحان واللى ميعرفهاش يسقط دي مرارة مختومة بختم النسر
بالله عليك يا ريس توصي علينا وزارة الصحة ويا ريت بالمناسبة دي تقوم وزارة الصحة بعقد دورات تدريبية للأطباء المصريين في اسئصال المرارة حتى لا يضطر 80 مليون مصري السفر لالمانيا
ترجعلنا بالسلامة يا ريسنا وعلى العموم كل المصريين متطمنين مدام ابنك جمال موجود وانا بقترح انه يتولي رئاسة الجمهورية وكمان رئاسة مشيخة الازهر، هو احنا هنلاقي احسن منه
 كان نفسي اقولك فداك نفسي يا ريس بس شيخ طنطاوي الله يرحمه كان دايما يقولها
عارفة ان فيه اغاني كتير مستنية رجوعك بس اسمحلي واقبل مني الاغنية دي
وجعك وجعنا كلنا
وصحتك بالدنيا عندنا
مين هيخاف عليك قدنا
طول ما أنت قاعد على قلبنا اسفة في قلبنا
واييييييه

37 comments:

Anonymous said...

تسلم ايديكى يا مروه و الله قولتى كل اللى عايزين نقوله_و ربنا يستر عليكى بقى

سبايدرمان spiderman said...

وجعك وجعنا كلنا
وصحتك بالدنيا عندنا
مين هيخاف عليك قدنا
طول ما أنت قاعد على قلبنا اسفة في قلبنا
واييييييه

هههههههههههههههههههههه
ههههههههههههههههههههههه

جااااااااااااامده قوي قوي قوي

هههههههههههههههههه

سبايدرمان spiderman said...

و بالمناسبه دي احب اقول من هنا
من عندك ومن مدونتك
الف سلامه عليك ياريس

^_^

يا مهشتكنا و يا مبشتكنا

عاشقه الرومانسيه said...

بوست فى الجون يالماضه
لماضتك بتعجبنى والله
(:

قلم رصاص said...

"دي مرارة مختومة بختم النسر"

هههههههههههههههههه

فعلا

ـ-ـ- أحمد عبد العدل-ـ-ـ said...

هتترفدى يادكتورة :)
سعيد لعودتك و لو تخاطيف للكتابة
أول حاجة قلتها النهاردة على خبر وفاة طنطاوى ،،، ياريتهم يتعظوا و يعرفوا ان لكل بداية نهاية ،،، للاسف واضح ان الريس عنده عقيدة انه مش هيموت و ان وقت الجد هيلاقى اللى ينفعه :( ،،، زى ما بيقولوا لا شفاعة فى الموت و أعتقد إن السنة الكونية هتحسم أمورنا عن قريب
أسأل الله له و لنا الهداية
و لمصر و أهلها السلامة
تسلم الأيادى

ست البيت said...

منورة البلوج يا دكترة
صحيح على رأي عبد العال حتترفدي
يا بنتي لمي لاتعابيين شوية
وامشي جوة الحيط

شوفتي فقعنا مرارة الراجل ازاي
مستحمل قرفنا
وغلاستنا
ورقدتنا على قلبه
وشوفي بقى لما يرقد على قلبك 80مليون
ألا صحيح بعد حوادث العبارات والدويقة والطرق السريعة واكياس الدم ملوثة
وسرقة الأعضاء
ووووو
لسانا برده 80 مليون
ولا ربنا رحمه شوية ؟
تحياتي ونفسي اشوفك في اسكندرية
لو القطة اللي عندي محدش خادها
حكلمك دي شيرازي ومن عيلة شيرازي محترمة
وقولي لصاحبتك اللي اتأمرت على جولي
تعالي شوفيها دلوقتي
عقبالها كده
يا لا
خيرها في ديلها
اقصد غيرها

مواطن شووجااع said...

ههههههههه

ما تحرمناش من بوستاتك أبداً يا دكتورة

فتاه من الصعيد said...

هههههههههههههه

بس خلاص :))

WINNER said...



ما فيه مستشفيات الجيش اللي زي الفل و آخر استعداد
!!

المهم بقى مرارتنا احنا اللي اتفقعت
مين اللي هيعالجها؟؟
و هيعالجها فين؟؟


blue-wave said...

انتى بتتكلمى فى ايه يا حجه
دا كان فيه واحد فى التيم المعالج المانى من اصل مصرى استبعدووووووووووة
انتى عايزاة يآمن مصرى على حياته؟؟؟؟
ربنا يخلى ثقتك فينا يا ريس

A32L MaGNoNa said...

انا حابة اتلامض معاكي وارد بالرساله الموجهة مني شخصيا للريس حبيبينا

ارجوكي شوفي البوست دا في مدونتي :)

http://a32l-magnona.blogspot.com/2010/03/blog-post_06.html

سومه...مجنونه فى بلد عاقل said...

هههههههههههههه انتى مصيبه يا لماضه
انتى يا بنتى مصدقه انها المراره
وبعدين حتى لو المراره هو مبارك اقل من اللى بيتعالجوا برا على نفقه الدوله من الممثلين والرقاصين والسياسيين ورجال الاعمال
يعنى هو ملوش نفس يعنى
متقلقيش على مرارتنا هى اتفقعت من زمان بس نتنت جوانا مشيلناهاش

مهندس مصري said...

ههههههههههههههههه
ما كلهم بيتعالجوا بره يا لماضة
مرات وزير الصحة بتتعالج بره على نفقة الدولة
و وزير المالية بيطلع يتعالج في أمريكا كل كريسماس على نفقة الدولة
فمش عايزة الريس يكون قدوتهم

Batool said...

well Ya lamada , very nice post, I agree with you & greet you :))) wi alf salama 3ala rayess,bas ew3a ye7selek haga ya lamada , rabena yestour :))))

Batool said...
This comment has been removed by the author.
Me7'o said...

إنتى مصدقة إنها لماضة
أنا قريت خبر بيقول إنهم إستأصلوا نسيج حميد من الريس

تفتكرى ممكن يكون إيه غير المرارة اللى يخليه قعد بعد العملية أربع أيام فى العناية المركزة؟؟؟؟

Me7'o said...

سورى
مرارة؟؟؟

أبو العريف said...

ينصر دينك يا استاذ نفيسسسسسسسسسسسسسسه

قصدي لماضه

بوست ف الجون

يعني هي مرارة السيد الرئيس مكنش ينفع تتعالج في مصر

يا مراكبي said...

وبعدين؟

انتي مش عارفه ان اللي بيتكلم في المواضيع دي بيروح وراء القمر؟ أصل ورا الشمس بقى زحمة قوي اليومين دول

وبعدين بصراحة احنا واثقين في دكاترتنا وكل حاجة بس ما حدش عارف النفوس فيها ايه ويا عالم الدكتور المصري ممكن يعمل ايه والا ايه

:-)

صيدلانيه طالعه نازله said...

الكومنت ده يا لماضه للدكتورblue_wave

و ليه متقولش انه خايف من بتوع التخدير يا دوك
ماهو لو واحد منهم بيشات مع حد من المعارضه يبقى كده ده خطر على معاليه
و لا ايه حضرتك

(((((((((((:وش مطلع لسانه

حصان المرجيحة said...

هههههههههههه
يابنتي كفاية حرام عليكي
الراجل تعبان
هههههههههه

ريم said...

بقالي ييجي سنة مثلا مش باجي هنا
و مش متابعة عالم التدوين قوي
بس دلوقتي انا مبسوطة جدا اني جيت
بجد حلو قووووي
:)))
و ضحكتيني جداً

مُخٌتَلِف دوت كوم said...

أدعوا الله أن يصلح حال رئيسنا فهو مسئول عن كل مصري يعيش بأرض مصر و سيسأل عنه امام الله عز و جل و أدعو الله ان يتم شفاؤه و أن يصلح به

هديـــل الـروح said...

ربنا يشفيه ويشفى كل مريض .فعلاً يا لماضه ده أكبر دليل ان مستشفيات مصر لا تصلح ان حد يتعالج فيها ..الريس خاف على نفسه وسافر مع ان فعلا كان زمان حالها اتظبط لو الريس اتعالج هنا
تسلم ايديكى يا لماضه ..وحشتينى والله

Prince-Palestine said...

لاا ماشاء الله لماضة على الاخر حلوة كتيرررر



انا جديد هون وبتشرف بزيارتكم الطيبة


دمتم بخير

Wanda said...

"كان نفسي اقولك فداك نفسي يا ريس بس شيخ طنطاوي الله يرحمه كان دايما يقولها"

:-))))))
ربنا يطول فى عمر الكل و اولهم لماضة

و سلامة الريس الف سلامة و معلش المرارة المهم البنكرياس يكون سليم

Anonymous said...

بوركتى

شاب مصري مفروس said...

ههههههههههههه
لا بجد انتى موضوع وحكاية ورواية
اسلوبك جامد جدا
وجايبة من الاخر يعنى
ربنا يكملك بعقلك ويحفظلك لماضتك
تحيتى القلبية

NaiRa said...

ههههههههههههههههههههههههههه بجد يا ميرو انتى جامده جدا
وبجد بخاف عليكى اوى
وفعلا مراره مختومه بختم النسر يعنى حاجه اصلى مش تيوانى ولا يابانى

لماضة said...

http://www.almasry-alyoum.com/article2.aspx?ArticleID=248590

حتى خديجة ولدت بره مصر
واضح ان مفيش دكاتره في مصر خالص

Abdullah said...

ALLAHO AKBAR :P

إبراهيم محسن said...

هههههههههههههههههه
شالوله المراره دي أحسن خسارة

والله زي العسل وكلامك تحفه
ربنا كبير

مكنش يقدر يشيلها فمصر لاحسن يسرقوها منه ويعملوا عليها عمل ولا حاجة
ماهو محدش يعرف يوصله غير الجن
والشياطين اللي حواليه

الراقـــص مع الذئـــــاب said...

السلام عليكم
ازيك يا دكتره
انتي بتعتبي علي الريس سفره بره بعيد عن دكاتره مصر بس مش عشان انتوا وحشين
انا خطبتي دكتورة وقسرت دا تفسير منطقي شوية

قالت بقي ان الراجل خايف ليخرف وعو في البنج عشان كدا حب يروح عند ناس متفهموش...
مش كدا برضو؟؟

shekomando said...

Nice post marwa today 6 April

أحمد عاطف said...

فعلا طول ما انت قاعد على قلبنا

طب نقول استئصال المرارة في مصر صعب

اللي محيرني يا لماضة مرات ابنه راحت تولد بره لييييييييييه

دا احنا من يوم ما ربنا خلقنا كمصريين مابنجيدش حاجه زي ما بنجيد الخلفة ومشتملاتها

دا الست عندنا ممكن تولد نفسها لو ممعهاش تمن الداية

تخيلي ان 60% من سكان الدول المجاورة عندهم يقين تام بان العلاج في مصر من أفضل انواع العلاج في العالم ... تخيلي لما رئيس بلدنا يطلع يتعالج بره

اكيد محدش هايفكر ييجي يتعالج هنا

نسر الشرق said...

لا لا لا لالالا
مش ممكن انتى رائعه والله العظيم انا مكنتش عارف دى مقاله معاه ولا ضده بس اللى انا
متأكد منه انه لو سمعها مش هيفهم
http://nisr-elsharq.blogspot.com/